தனி மரம்

பெரும் மலை ஒன்றின் மேல் 

தனித்து நின்றது அந்த பெரிய மரம் !!

"என்னைப் போல் நீயும் அநாதையா?"-

நான் கேட்டேன்.

கிளை அசைய சிரித்தது -

"கூட்டில் இரு குருவிகள்,

பொந்தில் ஒரு முயல்,

வேரடியில் இரு எலிகள்,

அங்கங்கே எறும்புகள்,

மேல் ஆபரணம் போல் பூங்கொடி -

இத்தனை பேர் உடனிருக்க

நான் எப்படித் தனிமரம்?"

"இயலாதவருக்கு இடமளிக்கும் யாரும் 

தனிமரம் ஆவதில்லையப்பா..."

உரைத்தது மரம் -

உறைத்தது என்

மரமண்டைக்கு!!